Featured હાસ્ય-વ્યંગ

જાહેરાતો ! દશલો

ભારત એ નવરાઓ નો દેશ છે , એટલા બધા નવરા લોકો કે આપણા લોકો “એડવર્ટાઈઝમેન્ટસ” પણ ધ્યાન થી જોવે છે ! ભારત માં TV પર બે પ્રકાર ની જાહેરાતો આવે છે. એક જે દિવસના ૬ થી રાત ના ૧૨ સુધી આવે છે જેના પર લગભગ ૧૦% જેટલો વિશ્વાસ બેસી શકે છે , અને બીજી જે રાત ના ૧૨ થી ૬ સુધી આવે છે જેના પર કોઈ ગાંડો માણસ પણ વિશ્વાસ ના કરે !

પહેલા પ્રકાર ની એડવર્ટાઈઝમેન્ટ્સ તમને અહેસાસ પણ ના હોય એવા એવા પ્રોબ્લેમ્સ તમને બતાવીને એના સોલ્યુશન્સ વેચે છે , હું મારી જીંદગી ને એકદમ મસ્ત રીતે એન્જોય કરતો કરતો પ્યાર કા પંચનામા જોતો તો , ને વચ્ચે એડ આવી : ક્યા કહીં આપકી સાંવલી ત્વચા કી વજહ સે લડકીયાં આપસે દૂર ભાગતી હૈ ? સાલુ હું મનોમંથન કરવા બેસી ગયો , કે આમને કેમની ખબર પડી ગઈ ! અઢી કલાક ના પિક્ચર નો નશો આ અઢી મિનિટ ની એડવર્ટાઈઝમેન્ટે ઉતારી દીધો ( અને હા , ત્રણ દિવસ પછી મેં ફેઅરનેસ ક્રીમ લગાડીને એ પિક્ચર જોતો હતો )

 

બીજા પ્રકારની એડવર્ટાઈઝમેન્ટસ જે આપણને ખુશી થાય કે હાશ ! આવા દિવસો તો નથી જ આવ્યા . રાત્રે આવતી જાહેરાતો માં વધતી ફાંદ , ખરતા વાળ અને ચહેરા પર ઓછી થતી બ્રાઈટનેસ સિવાય કંઈ નથી આવતુ. જો ચમત્કાર ને વિડિયો ના સ્વરૂપ માં દર્શાવવામાં આવે તો એ રાત્રે આવતી જાહેરાતો જેવુ દેખાય. મતલબ , સાડા ૪૦૦ કિલો નો એક અતિસુસ્ત પુરુષ કોઈ પાવડર “ખાઈ” ને ૬૦ કીલો નો થઈ જાય છે અને એ પણ ફક્ત અને ફક્ત ૩૦ દિવસ માં !! એટલે પ્રતિદિન ૧૩ કિલો વજન નો ધરખમ ઘટાડો !!

હમણાં થોડા સમય થી Lava ફોન વાળા ની એક એડવર્ટાઈઝમેન્ટ આવે છે , કે છોકરો છોકરીને એના ઘરે ચોરીછુપી થી મળવા ગયો હોય છે અને એટલા માં છોકરીના પપ્પા આવે છે અને છોકરો એના ફોનની રીંગ વાગે એમાં પકડાઈ જાય છે , અને છોકરી ના પપ્પા એનો “Lava” નો ફોન જોઈને ગાંડા ગાંડા થઈ જાય છે ! વિચારો , એક બંગલા માં માણસ રહે છે , જે ઘરમાં પણ સુટ પહેરીને ફરે છે , જેની છોકરી એના બોયફ્રેન્ડ જોડે “ઈંગ્લીશ” માં વાત કરે છે , એ માણસ ૫૪૯૯ રૂપિયાનો LAVA નો ફોન જોઈને ગદગદ થઈ જાય છે !!! ચલો પપ્પા નુ તો સમજ્યા , મારવાડી હોઈ શકે. પણ છોકરી ?? આધુનિક ભારત ની આધુનિક નારી એક ૫૪૯૯ રુપિયા નો ફોન લાવનાર ચિંદીચોર થી પટી જ કેમની શકે !!
આવી એક નહી , ઢગલો જાહેરાતો છે , પણ આજે ફેઅરનેસ ક્રીમ વાળા ની વાત કરીએ .

સૌથી પહેલાં તો એ સ્વીકારી લઈએ કે આ ફેઅરનેસ ક્રીમ વાળા ભારત ની જનતા ને “ભોળા” સમજી ને બેઠા છે ! આ ફેઅરનેસ ક્રીમ વાળા ના મતે તો જીંદગી માં તકલીફો ફક્ત અને ફક્ત છોકરીઓ ને છે , છોકરીઓ ને પણ જીંદગી માં જે તે મુશ્કેલી છે એ બધી એમની સાંવલી/બેજાન/રુખી/ખરબચડી/(આવા ૧૫-૨૦ વિશેષણો) ત્વચા ના કારણે જ છે , બાકી ઓછુ મગજ , ઓછુ ભણતર વગેરે તો ગૌણ બાબતો છે ! એમના મતે સ્ત્રીઓ ને જીવન ના દરેકે દરેક પડાવ માટે સંઘર્ષ કરવો પડે છે , પછી એ નોકરી હોય , લગ્ન હોય , ઘર હોય કે ગમે તે . અને આ સંઘર્ષ સોલ્વ કઈ રીતે કરશે? ફેઅર એન્ડ લવલી લગાવી ને ! સ્ત્રીઓ ને બિચારી બનાવવા પાછળ આ જાહેરાત વાળા નો જ હાથ છે ! અને મોટિવેશન પણ એવુ જબરૂ આપે ને ,

પરફ્યુમ : મહેકતી રહો
કપડા ધોવાનો સાબુ : બધા વખાણ કરે
ક્રીમ : સુંદર ત્વચા
સાબુ : ઓહ મમ્મી ! ( સંતુર સંતુર )

પુરુષો માટે ની જાહેરાત જોઈ છે? એમને એમ કે અમારી જીંદગીનો એક જ ઉદ્દેશ છે , છોકરી પટાવવાનો !

ફોગ : છોકરીઓ મલશે
વાઈલ્ડ સ્ટોન : છોકરીઓ સાથે સાથે એમની મમ્મીઓ પણ
ફેઅરનેસ ક્રીમ : છોકરીઓ મલશે
સાબુ : છોકરીઓ મળશે

અને ચલો , બધ્ધા ને ખબર છે કે યામી ગૌતમ પહેલેથી જ ધોળી છે બરાબર. આપણે જોઈ છે એને પિક્ચરો માં , આ શું એક જ ફોટા ની બ્રાઈટનેસ થોડી થોડી વધારીને એક ઉપર એક ગોઠવીને એક વીડિયો બનાઈ દેવાનો ! એડવર્ટાઈઝમેન્ટસ માં જો સૌથી આળસુ માં આળસુ હોય તો એ આ ફેઅર એન્ડ લવલી વાળા છે , સાલુ મહેનત જ નથી કરવી. એ જ સેઈમ કોન્સેપ્ટ , દસ ફોટા – ઉપરા ઉપરી ચડાવવાના – થોડી થોડી બ્રાઈટનેસ વધારી ને ! અને એક તો એ લોકો પોતે કન્ફ્યુઝ છે , હજુ માંડ એમની એક પ્રોડક્ટ ઘર માં વસાઈએ એમાં બીજા દિવસે નવી એડ કાઢે : અભી તક યે યુઝ કર રહે હો , અબ ઈસસે ભી બહેતર ફેઅર એન્ડ લવલી-ફલાણા ઢીંકણા એડિશન ! અલા ભઈ મેલ કે પૂળો..

 

દર્શવાણી : ખરાબ દિવસો એટલે , રાત્રે આવતી પેલી ચમત્કારિક શ્રી હનુમાન યંત્ર વાળી એડવર્ટાઈઝમેન્ટસ માં રસ પડવો .જે  અદાલત વાળો રોનિત રોય વેચતો હોય છે

About the author

Darshil Chauhan

2 Comments

Click here to post a comment